Dobraxe

A dobraxe é o modo de tradución audiovisual maioritario en numerosos países, como España; consiste na substitución dos diálogos orixinais gravados na lingua orixe por outra pista de audio que conteña os mesmos diálogos gravados na lingua meta. Malia ser unha práctica consolidada e antiga, existen varias cuestión que aínda cómpre abordar, por exemplo: a actual ausencia de guías ou convencións homoxéneas para os estudios de dobraxe no relativo ao uso de símbolos, segmentacións ou formato e en termos de expresión prosódica. O segundo problema garda relación coa calidade do produto final, que ás veces se ve afectada pola falta de integración das diferentes fases do proceso de dobraxe. Cremos que o modelo de produción cinematográfica accesible pode ofrecer grandes beneficios á dobraxe, converténdoa nunha reflexión previa e non de última hora no proceso de produción. Isto ofreceríalles ás persoas creadoras de contidos audiovisuais a oportunidade ter un maior control sobre a versión final noutra lingua e superar posibles dificultades que xurdan en fases posteriores.